中大生辦性 / 別文化節 關注組不滿大學變「三級影院」

中大生辦性 / 別文化節關注組不滿大學變「三級影院」

[2017.02.22] 發表

【明報專訊】中大學生報同中大學生會基督徒學生運動本周五開始喺中大舉辦「基督教性/別文化節」，性傾向條例家校關注組召集人黄偉明噚日去中大校長室抗議，反對中大借場，話咁係「縱容同支持學生做違反校訓嘅事」，又話「唔應該將大學變成三級影院」。

中大：符合場地使用條款

中大發言人回應話，學生事務處有向學生團體就申請借用場地提供意見，呢個學生活動符合大學場地一般使用條款，主辦學生團體會採取措施，確保活動符合大學規定，同埋保障參加者。

黃偉明對中大生辦活動好憂慮，話文化節活動充滿色情成分，灌輸扭曲性觀念，有損學生身心健康，係「不合於禮」，又批評活動播放嘅影片有未成年青少年性愛鏡頭，話咁係鼓勵青少年有婚前性行為、口交、手淫同肛交，又話活動正面肯定賣淫、召妓、性虐待等行為。

內容包括瑞典性教育動畫

據活動網頁，文化節希望透過不同活動，支援性小眾，令大專生同基督徒反思信仰、結合生活經驗，探索、了解同接納自己。當中包括被淫褻物品審裁處評為二級不雅、由瑞典性教育協會同瑞典教育廣播公司製作嘅性教育動畫Sex On the Map，講述一班中學生面對情慾萌芽感到憂慮，老師就透過醫學知識，令學生對自己嘅身體更有自信，亦明白溝通嘅重要。文化節另一活動係綑綁工作坊，主辦單位指淨係會示範最安全嘅綑綁技巧。

文化節工作人員會檢查參加者身分證明文件，細過18歲唔畀入場，涉及色情成分活動開始前會通知在場人士。活動印刷品同影像已呈交淫審處評級，當中有一條影片屬二級不雅，其他屬於非不雅亦非淫褻嘅一級，播片時會嚴格執行淫審處規定。