民主黨下周五黨慶 3特首候選人到賀

[2017.03.09] 發表

【明報專訊】民主黨下周五(17日)會喺九龍灣舉行22周年黨慶籌款晚宴，筵開50席，目標要籌600萬至700萬元。適逢特首選舉，曾俊華、林鄭月娥同胡國興3名候選人都會應邀現身，但3人會否同場碰頭就屬未知數，因為林太只去酒會，胡官酒會晚宴去晒，曾俊華一方就未知現身時間。

筵開50席目標籌700萬

近年酒會晚宴都由該黨元老李華明負責，到今年就由司庫袁海文接棒。袁海文話，今年唔係立法會或區議會選舉年，所以籌款目標較上年800萬少。至於有咩表演環節娛賓，今年退居做「籌款專員」嘅李華明(Fred)話，該黨一眾立法會議員都會粉墨登場拍短片，自己就會獻唱《幾許風雨》，其他表演細節就留個驚喜畀大家。

阿Fred話，拍賣環節以往不時出現冷場，所以今年唔會有，但民主黨會以另一方式籌款，有心人捐出物品後，由阿Fred做「紅娘」搵合適買家，今年恒基執董黃浩明就捐出紅酒。

3官員話去唔請陳維安

民主黨黨慶一向星光熠熠，阿Fred笑言黨員可以透過活動「connect」一下政商界大人物。佢話今年有3個問責官員應承出席，但無透露身分，因為萬一佢哋最終嚟唔到，都唔會引起尷尬，而民主黨因為去年宣誓事件，決定今年唔邀請立法會秘書長陳維安出席。

更多港聞