鄒秉恬暨「五月天母親」開騷 荃灣區議員考起網民

鄒秉恬暨「五月天母親」開騷荃灣區議員考起網民

[2017.04.17] 發表

【明報專訊】唔少區議員會邀請歌手為地區演唱會獻唱聯誼，選委會委員方保僑噚日喺facebook上，貼出一張喺荃灣大會堂影低、荃灣區議員鄒秉恬嘅演唱會海報相片，演唱會名為「鄒秉恬議員1/4世紀情懷暨五月天母親金曲演唱會」。咦，「五月天」貴為台灣知名樂隊，咁鄒秉恬所指嘅「五月天母親」究竟係邊一隊表演組合，定係指喺5月搞嘅慶祝母親節演唱會？Emily噚日透過鄒秉恬助理詢問演唱會詳情，至截稿前未有回覆。

約200座位未有人買飛

有網民問，海報所講嘅「五月天母親」，「係咪都(係)啲阿媽咋，五月母親節，咁咪即係所有阿媽囉」，有網民就笑言要買飛先知道邊位係「五月天母親」。海報寫票價最貴成180蚊，Emily噚日上城市電腦售票網查看售票情况，呢場5月6號晚喺荃灣大會堂舉行嘅演唱會，可供選購嘅大約200個座位中，截至噚晚8點仍然未有人買飛。

名廚李錦聯亦獻唱

睇番鄒秉恬fb，佢過去不時同本地歌手一齊喺地區演唱會獻唱，如果大家對佢印象唔深，其實佢曾經4次循地區直選出戰立法會換屆選舉，不過悉數落敗。根據今次演唱會海報，本地名廚李錦聯亦會獻唱，海報亦寫上「名貴鑽飾送贈有緣知音觀眾」，但未有更多資料。

更多港聞