海洋公園誕港產川金絲猴

[2017.04.19] 發表

【明報專訊】海洋公園前日(17號)有首隻「港產」川金絲猴出世，公園入面嘅賽馬會四川奇珍館噚日開始關閉，方便川金絲猴媽媽樂樂照顧BB，增進感情。

奇珍館關閉兩三日後部分開放

川金絲猴BB嘅父母來自成都動物園，爸爸叫其其、媽媽係樂樂，佢哋分別喺2015年及2012年來到海洋公園居住。川金絲猴BB目前由樂樂餵哺，情况穩定。公園噚日已全面關閉佢哋居住嘅四川奇珍館，等BB同樂樂有充分時間增進感情，並學識定時餵哺。園方會視乎兩母子嘅情况，再決定兩至三日後開放部分展館。

媽媽樂樂已上手

海洋公園動物及教育部執行總監蔣素珊話，好開心有第一隻喺香港出世嘅川金絲猴BB加入海洋公園嘅大家庭。園方感謝成都動物園喺川金絲猴繁殖計劃上為公園提供支援，令樂樂懷孕同分娩過程都非常順利。蔣素珊講起，雖然樂樂初為人母，但已經掌握到照顧同餵哺技巧，而BB亦已學識咗飲奶。

川金絲猴係瀕危物種，現存只有1.5萬隻，生活喺中國中西部野外。

更多港聞