【Emily】政府請180二級私人秘書 起薪$16,565

【明報專訊】疫情下唔少人失業，政府噚日展開二級私人秘書公開招聘，目標請180人。睇番呢個職位資料，要求中學DSE畢業，5科考獲第2級或同等學歷，起薪點係總薪級表第4點，即每月16,565元，職位頂薪係第15點，即31,750元，待遇都唔差喎。申請者要有少少電腦技能，包括中文文書處理速度達每分鐘20字，英文文書處理速度達每分鐘50個，同埋具備一般商業電腦軟件知識。

公務員事務局就簡介，二級私人秘書會調派到各決策局及部門工作，提供相關秘書服務，包括文字處理，管理日常工作同會議日程，處理查詢同其他辦公室支援工作等。具體入職要求已上載公務員事務局網站(csb.gov.hk/tc_chi/recruit/7.html)，12月24日截止申請。