【明報專訊】正義聯盟主席李偲嫣結婚喇！李偲嫣噚日喺facebook貼上婚戒相片(圓圖)公布喜訊，佢同Emily分享好消息時話，明年5月會同拍拖兩年幾嘅男朋友舉行婚禮。偲嫣嘅未婚夫叫謝鋮浚，現時喺香港專業進修學校擔任國際教育部副總監。 鋮浚哥星光下求婚 偲嫣透露，兩人上月某一晚食完晚飯後，男朋友帶佢去尖沙嘴海運大廈露天停車場，喺滿天星光下成功求婚，佢當時感到既驚喜又開心。一向全力支持前特首梁振英嘅李偲嫣，會唔會請CY出席婚禮呢？佢就笑言暫時未諗到咁遠喇。 未諗請唔請CY 李偲嫣分享喜訊時難掩興奮，話兩人最初係經朋友介紹認識，大家傾電話同約食飯互相了解，兩人性格好夾，佢大讚未婚夫體貼、識照顧，又孝順父母，未婚夫係學術思想派，自己就係行動派。李偲嫣話，佢哋兩人之間嘅感情唔涉及政治，未婚夫無既定政治立場，係一個持平公道嘅人。 另外，李偲嫣早前向兩間媒體公司興訟追討欠薪，被勞資審裁處判敗訴。對於會唔會上訴，李偲嫣未有明確回應，話自己只係打工仔，唔係有錢人，要衡量有無咁多錢上訴，而結婚呢單喜訊已經蓋過好多唔開心嘅事。
|
| |
| |
;){kind=small}
;){kind=small}
;)
