【明報專訊】新田購物城都仲未開，又有人提議興建新嘅邊境購物設施。一國兩制研究中心噚日發表咗份研究報告，建議港深合作活化中英街，發展成邊境購物街，同埋將附近發展成歷史文物徑同客家文化村，吸引遊客嚟購物同旅遊，仲話可以配合番大灣區優質旅遊購物及文化區嘅設想。 倡港深合作 配合大灣區發展 中心建議由兩地政府組成聯合工作小組，公開招標搵發展商負責項目，興建兩至三層、樓面面積70萬至100萬呎嘅邊境購物街，規模同又一城差唔多，香港維持60幾間商舖，深圳維持130幾間商舖，法律、稅制等安排都維持現狀，即係香港實施香港法律、深圳就實施內地法律。 一國兩制研究中心總裁張志剛建議，兩地都放寬進入中英街嘅要求，香港可以實施「團進團出」，畀港人透過旅行社申請去邊境購物街嘅通行證，深圳就可以提高可攜帶物品嘅價值限額，由𠵱家500至3000元人民幣，增至逾8000元人民幣。 張志剛話，發展邊境購物街唔會影響香港嘅禁區政策，邊境購物街嘅旅客亦唔可以進入香港其他地方，所以唔會影響港人生活，預計每日人流有2萬至3萬。佢同Emily講，遲啲會將份報告交畀中央、香港同深圳嘅相關部門等。
|
| |
| |
;){kind=small}
;)
