【明報專訊】年年大學迎新營，學生搞手不時都會搵人贊助，今年又有學生處理不當引發網民熱議。事緣位於西貢嘅「髀魔—雞髀第一店」負責人陳先生，噚日喺facebook專頁呻被科大學生?贊助後無故甩底，至晚上學生道歉。 昨晚道歉 小店接受 陳先生話，科大宿舍學生會屬會「冰川社三」有個男學生兩三個星期前搵佢，希望負責人贊助佢哋迎新營，店主見係學生，就一口答應贊助200隻雞翼；但對方一時又唔記得約咗人幾點交收，一時又喺交收當日凌晨先話想早半個鐘拎。陳先生平時12點先開舖，為咗炸雞翼畀學生，9點已返舖頭預備。點知過晒交收時間都唔見班學生，就問對方嚟唔嚟，個男仔原本話搵人嚟?，後尾講咗句「sorry」同「cancel」，更將小店嘅WhatsApp號碼封鎖埋。 帖文一出，網民即狠批學生不負責任，至噚晚帖文已有逾3200次分享。冰川社三嘅同學仔噚晚親身去咗小店同陳先生道歉，陳先生亦接受咗，同Emily講希望事件告一段落，話相信班學生承受好大壓力。 科大「冰川社三學生會」噚晚喺facebook發出道歉聲明，指噚日因天雨關係令迎新營活動需臨時改動，未能及時作恰當安排同決定，承認因為個人疏忽，當時無及時通知店主，對造成食物浪費「感到非常抱歉及內疚」，又感激店主嘅寬宏大量。 科大回覆指已經向學生了解，學生承認做得唔好，大學又提醒同學留意言行，並注意社會對接受高等教育學生嘅期望。
|
| |
| |
;){kind=small}
;)
