【明報專訊】入境處長曾國衛同海關助理關長(邊境及港口)何珮珊係夫妻可能唔少人都知，佢哋當初係點識？曾國衛受訪時講出當年經歷，大讚老婆有眼光揀中佢，仲話直到𠵱家邊個追邊個都係「羅生門」。 邊個追邊個係「羅生門」 曾國衛接受港台《舊日的足跡》訪問，憶述當年同老婆喺保安局做同事，工作好多時要互相配合，慢慢就一齊咗。佢大讚老婆樣貌娟好、身材適中，職位又高，但話自己當年樣貌平平，「咁都睇中我，咪佢眼光好」。佢話後來自己要調派上京，何珮珊都覺得對仕途好，但因為要分開兩地，兩人就有默契結婚啦。結果因為曾國衛上咗京，成個結婚安排都係老婆搞晒，行完禮都冇度蜜月。 曾國衛憶述少年時代渾渾噩噩，性格又叛逆，老師都覺得佢唔聽話。佢會考後升唔到原校，去咗當年被視為「飛仔學校」嘅新法書院讀預科，當時教經濟嘅老師並冇覺得佢係籮底橙，反而上堂經常同佢互動，曾國衛就好鍾意上佢堂，高考經濟科仲攞A，雖然唔夠讀大學，但令佢覺得考大學唔係遙不可及，就自修一年用心讀書，結果翌年高考2A3B，考入中大新聞與傳播學系。佢形容自己嘅經歷都幾勵志㗎。
|
| |
| |
;){kind=small}
;){kind=small}
;)
