【明報專訊】進出口界立法會議員、民建聯黃定光(象哥)原來平時得閒就鍾意上廣州「進口」眼鏡自用，佢呢排戴住嗰副琥珀色眼鏡，就係佢趁高鐵香港段開通嗰日，搭「動感號」喺廣州南站落車，再轉地鐵去廣州一條專賣眼鏡嘅街配嘅。 象哥話太太、工聯會榮譽會長林淑儀嗰次一口氣配咗半打眼鏡。佢話近20年都介紹咗唔少朋友去嗰度配眼鏡，自己買買埋埋都近100副，笑言係貪靚。 點解鍾意返廣州配眼鏡？象哥話，嗰度成條街好專業，係超過7000間眼鏡相關舖頭嘅集中地，分門別類咁有驗眼、買鏡框、配鏡片、買眼鏡盒同眼鏡布嘅舖頭，價錢仲十分相宜，大約一個鐘左右就有得拎。 象哥話，喺香港配一副眼鏡嘅價錢，等於喺廣州買一打。佢話都會介紹議員同事去配，仲試過帶助理集體上去配眼鏡呀！
|
| |
| |
;)
