【明報專訊】民主黨無簽學民思潮提出嘅全民公民提名約章，民主黨張文光前排接受訪問時仲話約章令泛民出現裂痕。不過，民主黨創黨主席李柱銘(Martin)就讚賞學民班年輕人提全民提名好醒目，話無理由傾吓都唔得，但轉個頭又話自己同張文光𠵱家已經無偈傾，點解呢？ Martin話：「佢捧曼聯，我捧車路士！」英超剛開季，Emily當然明白球迷心情。 李：佢捧曼聯 我捧車仔 講番政事，Martin認為𠵱家最傻係喺公民提名呢個問題上糾纏，其實應該百花齊放傾方案。咁唔知佢點睇民主黨現任主席劉慧卿話，希望佢之前提嘅特首普選方案(Martin其後主動撤回)翻叮復活呢？Martin話相信好多人都想用佢個方案，但唔該用時唔好提佢個名，事關佢認為目前唔係妥協時候，費事提咗反而煩。
|
| |
| |
