【明報專訊】特首梁振英(CY)噚日招呼200幾名基層市民去禮賓府參觀，仲搵咗架雪糕車到場大派雪糕。CY事後都喺網誌講番呢個活動，仲上載幾張相。而當政府新聞網都只係轉載CY網誌，建制派輿論陣地「港人講地」就有獨家片段，片中見到CY又向小朋友派蟋蟀。「港人講地」總編張瑞蓮就話，有個「有份出席聚會的網民」提供影片，見到段片幾得意，所以就上載。 港人講地有埋片段 CY網誌提到，香港基層市民生活壓力大，同家人聚少離多，所以同太太唐青儀特地安排基層家庭到禮賓府參觀，共敘天倫之樂，亦可了解禮賓府歷史背景同建築特色。 喺「港人講地」嘅片段中，見到CY拎住一袋蟋蟀，派發畀在場嘅小朋友，小朋友仲笑得好開心。其實CY舊年喺禮賓府搞嘅中秋園遊會都有送蟋蟀畀來賓，不過，當時有動物權益組織就話送禮不當，因為動物都係生命，唔應該拎嚟做禮物。
|
| |
| |
;){kind=small}
