【明報專訊】公民黨陳淑莊(Tanya)對鐵路事宜非常關心，除咗高鐵及一地兩檢外，有傳媒噚日報道，沙中線紅磡站擴建地盤月台層疑有鋼筋接駁位造假，Tanya亦好關心，喺運輸及房屋局長陳帆向傳媒交代時，全程聽埋一份之餘，仲「化身」記者一齊發問𠻹。 陳帆噚日去立法會回應議員口頭質詢後，就回應記者有關沙中線嘅提問，Tanya非常關心陳帆點答，仲好似記者咁，將手提電話放去「咪兜」，錄起陳帆嘅回應，佢仲坐喺一眾記者後面，側晒頭咁想聽清楚陳帆點講。去到答問環節，Tanya更加忍唔住，多次好似記者咁喺後面嗌問題，希望陳帆回應承辦商係咪「串謀詐騙」，雖然Tanya聲音響亮，不過陳帆一直都無回應呢條問題。 陳帆離開後，工程界議員、經民聯主席盧偉國及實政圓桌田北辰亦先後回應事件，Tanya亦坐定定聽埋兩人回應，未拎走手機，最終佢錄起3個人嘅回應長達半小時！
|
| |
| |
;){kind=small}
