三獅眾志成城 未來仍然可期
修夫基團結小將 不再「明星隊」各有各踢
英格蘭在世界盃季軍戰，戰來一副「收夠籌」模樣，以0：2敗予比利時，勇奪殿軍。打足7場衣錦榮歸，足證好波不如好運，但有運都要識行。英格蘭「渣渣#」是不爭事實，但展現團結與紀律，球員願意改造遷就。修夫基的「育成球隊」遊戲，仍然有得玩。文：路斯
筆者在賽事開始前，眼見英格蘭立定決心，棄巨星揀新星(其實英格蘭有誰稱得上球星)，加上抽中強弱懸殊組，晉級不成疑問。隊中無名大於實或過氣球星，倚靠一班細路，加上「由細睇住大」的教練修夫基。回想過去十幾年，位位大哥陣上貌合神離，各有各踢，合作欠奉，隊波睇得唔打得。修夫基改變陣式與戰術，帶來「消失的紀律」。球員願意遵從指揮，連格成為走動王，迪利阿里掃蕩到後場，基爾獲加只守不攻(但間中甩漏)等，讓「半生熟」英軍有力一戰。要由哈利卡尼及史達寧墮後迎波分波，球迷睇見都辛苦，就知三獅前線創造力係零。但練成「英一招」，靠死球打江山都可以碌到入4強，足證三中堅兩翼#運作大致成功，守得唔錯。
受惠於歡樂下線 晉級4強有運
今屆英格蘭有運氣加乘，不再如過往大賽死於非命(2010年對德國)，或雖敗猶榮(各種互射12碼慘劇)。分組賽程先弱後強，不用面對出線生死戰，信心愈戰愈強，更有幸被踢入「歡樂下線」。16強遇上占士洛迪古斯缺陣的哥倫比亞，英軍領先一球下暴露弱點。年輕三獅，攻擊無創造力，防守無集中力，陣式愈打愈亂，虎頭蛇尾，捱到12碼卻打破詛咒，更打起24歲門將比克福特。加上運氣保佑英軍，否則奧斯賓拿5球全部捉到路，豈會只救出一球？不過，4強雖然一早領先，但愈踢愈怕輸，退守到失去方寸。運氣用盡，實力見盡，心勁還要輸給熱血克羅地亞，自然「大限」已盡。
比克福特打出表現 未來4年宜培育後防球員
近十多廿年，英軍代代門將均有「代表作」。比克福特對哥倫比亞打出信心，對瑞典更打出氣場。他反應快，保持專注，初試啼聲應付大賽，無嚴重犯錯，實為英格蘭本屆最大發現，至少歐國盃和下屆世界盃都唔使愁。今屆大部分球員在未來4年仍是主力，亦有足夠時間培養穩定後場的大將。
而且，英格蘭去年連取U17世少盃及U20世青盃，青年「妖人」陸續有來。找出懂得致命傳球的「10號仔」，取代邊盤球邊「思考人生」而失去控球的史達寧，英格蘭在未來大賽，如今屆踢到最後至coming home，不是夢。
