【明報專訊】民建聯立法會議員葛珮帆(EQ)召集成立嘅「禁蒙面法推動組」噚日開記者會，講到點解要立禁蒙面法時，話暴力情况不斷惡化，有警員被淋鏹水、有警員「超過十成皮膚燒傷」。 十成燒傷咪即係體無完膚？EQ喺記者會後就補番個澄清，話記招上想講有警員10％嘅皮膚燒傷，即係一成。佢話對於自己講錯嘢十分抱歉。 記者會有7個推動組成員出席，但主要發言嘅係EQ、港區人大代表陳曉峰同警察員佐級協會前主席陳祖光。 「釣魚」民記人搶晒鏡 呢個記招有片段喺網上瘋傳，但焦點唔係3人嘅發言，而係坐喺EQ背後不斷「釣魚」嘅民建聯社區幹事劉毅律師。Emily喺記者會都留意到佢，因為記招開始無耐佢就被睡魔急call，佢極力頑抗，只係「釣魚」。 另外，記招原本喺南洋酒店宴會廳，但噚日突然改喺立法會一個小房間舉行。EQ解釋，因為酒店收到「恐嚇」信息，為保障員工安全，要取消佢哋嘅記招。
|
| |
| |
