【明報專訊】示威喺各區持續，有路面被堵塞，呢幾日紅磡海底隧道全線封閉，多條道路都有塞車，交通有啲混亂。一直要求政府止暴制亂嘅民建聯，噚日就出新聞稿呼籲政府喺非常情况下特事特辦，建議之一係要求喺道路交通未回復正常時，政府暫緩收取各條隧道收費，以加快車流及紓緩道路擠塞。 民建聯認為，喺可行情况下，政府應協調各個部門，協助盡快清理堵塞道路嘅雜物，以恢復主要幹道交通正常運作；協助港鐵公司改善鐵路保安，設法維護路軌唔會再遭受暴徒丟入雜物影響鐵路行駛及危害乘客安全；敦促運輸署及各交通機構時刻發放最新交通信息，確保市民獲得最新交通資訊。 工聯會噚日就發新聞稿，指香港過去幾日進入黑衣人暴力「恐襲」，形容佢哋嘅行為係「黑魔」暴行，對此予以最強烈譴責；強烈要求特首統領政府調動所有力量，成立跨部門抗暴行動機制，調動行政、立法、司法全力配合止暴制亂，全力救港於「淪陷」邊緣。
|
| |
| |
