【明報專訊】區議會選舉落幕，不論泛民、建制派都有人喺選舉中投訴過程混亂，亦有選民話明明未投票，但去到就被票站職員指已投票。 立法會噚日審議選舉法嘅技術修訂，議員發言時就乘機投訴選舉過程不公，有人就建議政府投票電子化；工聯會陸頌雄就話，人有相似，靠人手核對投票者同身分證係咪同一人有可能會出錯，更自覺同立法會主席梁君彥個嘴形相似，都係「嘴大大」。 陸頌雄話，好多孖生兄弟姊妹個樣都相同，即使唔係孖生亦會好似樣，佢舉例話，「(梁君彥)主席你咁靚仔，男士著西裝，其實好多男士都差唔多，主席個嘴形同我都有啲似吖，個嘴大大咁」，陸頌雄自己講完都忍唔住笑。民建聯柯創盛發言時亦質疑，政府花咁多錢整智能身分證，點解拎票嘅過程唔減少用人手處理，採電子化方式。 工聯會麥美娟發言時批評政府做技術修訂無用，質問政府點確保選舉公平；要長者坐輪椅，仲要烈日當空曬成個鐘去排隊投票，做法唔人道。
|
| |
| |
