【明報專訊】香港出現口罩荒，懲教署生產、印有「CSI」字樣嘅口罩何去何從備受關注。連登討論區日前有網民出帖，質疑有人濫用CSI口罩、講到要考慮「私了」用家，引起社福界立法會議員邵家臻嘅注意，形容係非常危險，呼籲市民冷靜。阿臻強調「千錯萬錯都係政府」，係政府本身嘅責任，呼籲市民搞清楚矛頭。Emily睇連登個post，有唔少網民都勸阻出post嘅人，相信阿臻唔使太擔心。 唔少議員都有關注CSI口罩問題，會計界梁繼昌特別就此事去信審計署長朱乃璋，要求署長就懲教署過去3個月口罩生產及儲存量、政府如何分派懲教署製作嘅口罩，以及分派對象、數量等做審計；朱乃璋其後回應稱已經備悉建議，會制訂工作計劃表加以考慮，強調正密切留意事態發展。
|
| |
| |
