【明報專訊】民主派要求將警隊開支同預算案分拆審議，另一邊廂，民建聯漁農界立法會議員何俊賢就想政府抽起港台撥款，批評港台節目如《頭條新聞》等「一路唱衰社會，挑起社會矛盾」。 話《頭條》唱衰社會 挑社會矛盾 何俊賢噚日喺立法會財委會會議上，話對一啲政府部門好不滿，包括港台，斥《頭條新聞》早前拎「不實報道」去揶揄警方，之後又話自己唔係新聞節目，但又拎新聞自由嚟做嘢，認為為咗社會，要斷咗呢啲部門嘅撥款，「我都未知道(政府)會唔會抽起港台撥款」。 何俊賢喺會上係最後一個發言，但由於夠鐘散會，政府官員未及回應。根據新一份財政預算案，港台嘅教育電視節目喺2020/21年度預算會減至零，唔知呢個算唔算何俊賢提及嘅抽起撥款。 教育電視節目預算減至零 《頭條新聞》有新環節叫「驚方訊息」，由藝人王喜做嘉賓主持，早前一集話警方防疫裝備比醫護人員仲充足；又話曾接載確診旅客嘅郵輪抵達香港後，防疫人員送發燒船員上救護車，防暴警就企喺100米外戒備。 警務處長隨後去信廣播處長梁家榮，斥《頭條新聞》「以嘲諷形式抹黑警隊」，表示遺憾。
|
| |
| |
