【Emily】何君堯麥美娟話泰博「無賴之冠」 唔跟總辭係「建制派臥底」 倡加人工
[2021.01.02] 發表
【明報專訊】2020年過去，同屬立法會新界西議員嘅建制派何君堯、工聯會麥美娟(Alice)前晚做網台節目，其間話要選出2020年「反對派十大無賴龍虎榜」，佢哋就話同樣係新界西議員嘅熱血公民鄭松泰(泰博)居首，不過反而話要求加泰博人工，何君堯仲話對方唔跟隨泛民總辭，簡直係「建制派臥底」、「有血性」。泰博對此表示無回應。
Alice叫大家唔好笑泰博，話對方𠵱家勤力咗開會，笑言「當所有人(民主派)總辭後，呢個人應該加人工嘅」。何君堯話，泰博同民主派若即若離，𠵱家佢一個人代替晒整個民主派，幫香港人慳番好多錢，加人工「畀番少少回贈佢都應該啩」。
民主黨兩俊宇列「三甲」
龍虎榜三甲內，民主黨人佔餘下兩個，前議員鄺俊宇、屯門區議員盧俊宇分別排第二第三。Alice話鄺俊宇嘅故事勵志，當知道對方買樓時，佢立即笑黨友黃國健「做咗3屆(立法會議員)都未換到樓，人哋一屆都未做完，又買樓又買車」。盧俊宇早前涉浪費警力被捕，佢前年喺區選中撼贏何君堯，何君堯就話兩人分屬好友，「我好似烏蠅紙，專吸烏蠅過嚟」。
更多港聞
【明報專訊】唔少人近日都回顧剛過去嘅2020年，香港警察噚日喺facebook盤點2020年同市民「加強溝通」嘅數據，提到為促進同傳媒溝通及...
詳情
相關新聞
