【明報專訊】佔中運動予人沉重感覺，為令大家輕鬆吓，同時籌款，噚日佢哋搞咗第一個文化沙龍活動，邀請導演兼演藝學院電影電視學院院長舒琪、佔中發起人之一陳健民及短片《阿潘》導演詹可達，同市民一齊睇電影茶敘。不過，陳健民竟然喺中場時靜雞雞走開咗，原來要去幫人「交差」。 導演舒琪支持熄電視 免費電視發牌風波令舒琪有感而發，即場叫大家支持「無綫台慶熄電視」活動。佢話支持熄電視唔係針對無綫，更加唔係要睇阿叻(藝人陳百祥)跪返屋企，「who cares？阿叻唔係我敵人，呢啲小人唔會係我敵人」。佢話響應熄機運動，係要顯示民意嘅力量同醒覺，「收視跌到11、12點，已經對無綫有好大打擊」。 當大家專注欣賞短片時，陳健民走開咗，原來佢去咗餐廳門外接請願信。話說前幾日佔中搞名人飯局籌款嘅時候，有幾個聲稱喺上次七一遊行曾被佔中者打嘅男人已經向陳健民遞信，幾乎同一班人噚日再出現，話又要遞信，陳健民於是問佢哋，「你們前天不是已遞了信嗎？」其中一個人答，「我們這次要遞給戴耀廷。」但戴耀廷根本唔在場，所以又搞到陳健民。陳健民話，當時呢批請願者仲細細聲講，「你知我們要交數，麻煩你接一接！」
|
| |
| |
;){kind=small}
