葉璐珊認共青團員 馮敬恩自封藍血人 港大SU選情激烈

葉璐珊認共青團員馮敬恩自封藍血人
港大SU選情激烈

[2015.02.04] 發表

【明報專訊】又到一年一度選學生會嘅時候喇，今屆港大學生會選舉嘅選情可謂相當激烈，其中一個被人質疑係「紅底」嘅候選內閣成員葉璐珊，噚日承認自己係共青團員，但強調同佢政治取向冇關係；另一個候選內閣嘅會長就被揭發喺社交網站，話自己係「藍血」港大人，話警察IVE仔只會做死一世警察。

葉指好正常「唔了解先會驚訝」

學生會候選內閣Smarties嘅候選康樂秘書、內地生葉璐珊之前被質疑係「紅底」。港大噚日舉行中央諮詢大會時，佢承認係共青團員，又話加入共青團係一個好正常、好普遍嘅現象，「港大99%嘅內地生都係共青團員」。佢解釋話喺內地讀中學，所有人都會參加共青團，但其實係冇政治活動嘅，香港學生對內地唔了解先會咁驚訝。

佢話自己絕對唔係紅底，認同港大學生會嘅立場先至會上莊，但估唔到港大學生會個政治性會咁強，一個內地生上莊都引起咁多關注。

嘲警出身IVE 馮稱願道歉

另一候選內閣(目月)峯(目月，同「明」，亦可解作視察)嘅會長馮敬恩噚日都承認曾喺社交網站鬧警察嘅教育背景。佢嘅競爭對手、Smarties會長就喺諮詢大會讀咗一段佢嘅status，「我讀港大，係藍血之人，你班PC IVE仔，一朝水鬼升城隍，都仲係IVE仔」。馮敬恩解釋話呢段說話係舊年9月27號朝早，佢喺政總出面等咗通宵，天光就見到警察打學生同噴胡椒噴霧，一時對警方處理手法好不滿先會打呢段說話。但佢好快已經刪除咗，無意冒犯警察同IVE學生，但如果有人因為咁唔開心，佢願意道歉。