會拖篋 絕不會踢篋 毛孟靜范國威﹕唔會自稱勇武

會拖篋絕不會踢篋毛孟靜范國威﹕唔會自稱勇武

[2016.01.07] 發表

【明報專訊】新民主同盟范國威(Gary)同公民黨嘅毛孟靜2013年初成立「香港本土」，齊齊推動本土議題，噚日佢哋開記者會，回顧3年工作，毛孟靜就特別提到，佢同范國威唔會自稱「勇武」，會拖篋抗議但絕不會踢篋，仲話啲「唔會拋頭顱、灑熱血嘅人，無資格批評人唔去拋頭顱、灑熱血」，唔通佢哋要同都係打着本土旗號嘅勇武派劃清界線？

批隔岸觀火者無資格話人

毛姨姨同Gary就強調，唔係要同其他人劃清界線，只係佢哋唔會號稱係溫和或者勇武，只係會以香港為本位，期望喺政策層面講本土。Gary話，佢哋唯一一次譴責其他人，就係上年屯門一次反水貨示威中，有示威者踢篋，佢認為咁做係轉移咗焦點，但過去都有同其他本土派合作，亦試過開聯合記招，強調本土無專利。

Gary話，香港本土成立3年雖然受到打壓，被指係搞港獨等，但認為由剛過去嘅區選，以至唔同議題上港人嘅反應，都見到港人本土意識強，其他政黨都不得不調整立場，佢哋未來亦會繼續喺捍衛港人利益嘅議題上發聲。

撐李波遊行毛姨姨籲勿模糊焦點

近日銅鑼灣書店負責人李波失蹤，支聯會周日會舉辦遊行聲援李波；毛姨姨噚日亦呼籲大家出席，但希望大家參與，唔好又變咗批評支聯會係「左膠」，甚至發生衝突，否則又會將事件模糊咗。

更多港聞