學民新黨Demosistō 點讀𢱑晒頭 羅冠聰認艱深「會反省」

學民新黨Demosistō 點讀𢱑晒頭羅冠聰認艱深「會反省」

[2016.04.07] 發表

【明報專訊】由前學民思潮召集人黃之鋒、前發言人周庭同黎汶洛等人牽頭成立嘅新政黨將會喺周日(10日)面世。新黨名叫「香港眾志」，英文名係「Demosistō」，根據新黨成員之一嘅羅冠聰解釋，Demos係「人民」嘅意思；Sistō係拉丁文「站起來」嘅意思。不過，新黨未正式面世，就已經有人冒認新黨開網站同facebook page，睇嚟「香港眾志」嘅公關工作需要再加把勁。

黃之鋒噚日發放「《眾志圍城》首映禮暨記者招待會」嘅採訪通知，「由黃之鋒、周庭、黎汶洛、羅冠聰領銜呈獻，一部為香港未來而寫的大作 —— 《眾志圍城》」，仲附上一張模仿電影《飢餓遊戲》嘅海報，女主角改由周庭手持弓箭，講明「一箭傾城」。根據電影海報，仲印上「導演舒琪」，舒琪同Emily講一切留待周日公布。

至於有咩嘉賓會出席首映禮，黎汶洛同Emily講「到時就會知，保持神秘」。佢話當日會場有約100個座位，預留一半畀記者，其餘係畀支持者或友好團體。

黃之鋒發放採訪通知無耐，「Demosistō」就已經喺網上被惡搞，有人覺得個名太深太離地，連讀音都唔知係咩。羅冠聰就話，名字艱深，難以發音，「這些批評我一概認同，亦會深切反省」。羅冠聰亦解釋，新政黨中文取名「香港眾志」，係因為相信改變香港、扭轉我城命運嘅力量，係植根於香港普羅大眾嘅意志中，以「眾志」之名「聚眾之志」，亦取同音「種志」。

更多港聞