重複提名黃國健入UGL調查委會 長毛被提醒「留心開會」
[2017.02.04] 發表
【明報專訊】立法會內務委員會噚日開會，選出調查特首梁振英UGL收款事件委員會嘅成員同正副主席，委員會最終由11人喺無競爭下自動當選成員，其中7人係建制派，成員互選出獨立謝偉俊做主席，民建聯周浩鼎做副主席。
噚日會議發生一段小插曲，話說議員要競逐做委員會成員，要先攞到1名議員提名，再由1名議員附議，再由獲提名者接受提名。正當建制派已經提名夠人嘅時候，社民連梁國雄(長毛)疑似「玩嘢」，突然再提名多6個建制派做委員會成員，部分更由民主派「附議」，包括工聯會麥美娟同黃國健。
麥美娟拒接受提名：唔使客氣
麥美娟被內會主席李慧琼(Starry)問到接唔接受提名，佢即刻話「唔使客氣」，而黃國健其實一早已獲提名同接受咗，搞到Starry都要溫馨提示長毛：「請你留心開會。」可能噚日初七「人日」，會議氣氛其實相對輕鬆，無劍拔弩張，公專聯梁繼昌獲提名，公民黨陳淑莊附議，但Starry叫咗對方做「Tanya議員」，引嚟一片笑聲。
最後委員會成員名單，建制派包括周浩鼎、黃國健，經民聯梁美芬，新民黨容海恩，獨立馬逢國、何君堯同謝偉俊；民主派就有民主黨林卓廷、尹兆堅，公民黨楊岳橋，同埋梁繼昌。
更多港聞
【明報專訊】香港浸會大學學生會喺下周四（2月9日）舉行「校巴日」，抗議來往九龍塘地鐵站同浸大校園嘅專線小巴因獨市經營，而不斷加價，當日除咗提...
詳情
大富翁公布由香港人投票選出嘅「大富翁：香港版」新版圖，22個地點中，太平山以高票當選成為最貴嘅「地王」，而新界區成為版圖上最大地域，有9個地...
詳情
相關新聞
