引劉江華為例 唐英年支持蔡若蓮做副局

引劉江華為例唐英年支持蔡若蓮做副局

[2017.07.11] 發表

【明報專訊】新任特首林鄭月娥上場後，政界大吹和風，曾喺特首選舉中高調撐林太嘅政協常委唐英年噚日都讚不絕口，話林太說話、姿態都真係做到「包容、兼聽」。不過唐唐就話嚟緊有兩個挑戰可以試到真章，包括副教育局長人選同埋「一地兩檢」。但對於民主派強烈反對福建中學校長蔡若蓮擔任副局，係咪需要順應民意，唐唐卻力撐人選，話林太應堅持自己選擇。

唐唐解釋，只係見到泛民有兩個反對理由，一係蔡若蓮曾落選立法會，二係對方來自教聯會、有左派背景。佢就用年前落選立法會舉選嘅民政事務局長劉江華做例子，反問﹕「劉江華做得唔好咩？」港大民研6月底做咗個問責官員合適度調查，認為劉江華適合做新政府局長嘅合適度淨值，即係適合減去不適合，係-14點。至於港大民研6月做嘅上屆官員民調，劉江華嘅支持度淨值就係-25點。

唐唐又反駁，「教協係中立咩？」佢話現任勞福局長羅致光來自民主派，但無人會質疑佢背景，更指自己都會全力支持羅致光。唐唐就希望市民「聽其言、觀其行」，又講笑話蔡若蓮無前任特首梁振英「咁大殺傷力」。