當年少人有電話 50人只搵到8個 羅致光尋1966年同窗
[2017.07.17] 發表
【明報專訊】上個禮拜全港中小學生都面對「放榜」，其中唔少問責官員都喺中學文憑試放榜前，返去中學母校為師弟妹打氣。勞工及福利局長羅致光(圖)噚日喺網誌提到，升中派位放榜反而勾起佢「想當年」嘅感觸，仲特登勸升中同學，要珍惜童年時代友誼，「失去了便難以再找回來」。
勸升中生珍惜童年友誼
事緣羅局長見到有同學喺電視訪問話唔捨得老友記各奔前程，就諗番起自己1966年喺堅尼地城嘅呂明才紀念小學時，同班同學中少於三分之一人屋企有電話，大家升中後就失去聯絡。羅局長仲話佢幾個月前已諗計聯絡番呢啲「半世紀前」嘅同學仔，但搵晒全班50人當年地址簿上嘅樓宇名，當中只有15人嘅樓宇仲存在。之後佢千方百計下，都只係搵到8人咋。
講完私事，羅致光就話嚟緊政府都「放榜」，公布副局長同政治助理人選，話自己希望早日「齊腳」，幫佢分擔工作。
政務司長張建宗呢排就忙緊同傳媒食飯交流，佢話繼上個禮拜同傳媒高層由強積金對冲傾到大灣區發展，嚟緊就會同前線記者見面，希望做到「與傳媒同行」咁話。
更多港聞
【明報專訊】港鐵每日客量超過460萬人次，繁忙時間車廂人多擠迫，容易畀色狼有機可乘。警方數字顯示，舊年喺港鐵範圍接獲149宗非禮舉報，比前年...
詳情
相關新聞
