話言論自由有界線 何君堯撐DQ 被翻「殺無赦」論
[2018.01.29] 發表
【明報專訊】香港眾志常委周庭前日因政團嘅「民主自決」主張被取消參選立法會補選資格，公民黨議員郭榮鏗(Dennis)同建制派何君堯噚日出席港台節目《城市論壇》就事件唇槍舌劍，何君堯強調言論自由有界線，Dennis隨即翻對方「殺無赦」言論舊帳，反問﹕「有人講一句殺無赦就係言論自由，有人講民主自決就要被全面封殺，呢個係咩社會？」
郭榮鏗﹕講殺無赦就係言論自由 講民主自決就全面封殺
周庭噚日同場出席節目，何君堯發言時形容對方被DQ令人遺憾，讚佢有才華同思維，「唔錯㗎啲質素」，但就要行番一條正確道路。Dennis之後反駁，話何君堯覺得正確嘅道路，其他人未必覺得正確，而呢個正正係多元社會同言論自由嘅好處，批評選舉主任無權判斷邊一條先係正確嘅政治道路。
Dennis批評，何君堯主張「殺人」就得，但有人推動民主自決、無用暴力，就要被封殺，呢個先係問題所在。何君堯唔滿意被翻舊帳，話自己已經就「殺無赦」言論解釋過百次，批評泛民議員總係選擇性去聽。民主派本月喺立法會動議就「殺無赦」言論譴責何君堯，但喺建制派護航下，立法會通過不處理譴責動議，即係何君堯唔使被立法會譴責。
更多港聞
【明報專訊】2007年退休嘅城市大學前校長張信剛離開校園之後，重拾後生時嘅興趣，研究絲綢之路上各個地方嘅文化。Emily早前同張教授傾過，佢...
詳情
服務20年獲理大嘉獎 康復治療學者 自創雜錦功夫減壓
【明報專訊】中國有唔少宣稱有養生功效嘅功夫，好似氣功同太極拳。喺理工大學做咗20年、獲長期服務獎嘅康復治療科學系系主任曾永康，細個學過功夫，... 詳情
相關新聞
