【明報專訊】諾貝爾獎噚日起陸續揭曉，彭博新聞報道，奧斯陸國際和平研究所預測，香港眾志常委羅冠聰有機會奪得今年諾貝爾和平獎。有網民投稿去facebook專頁「CUHK Secrets」提出「香港版諾貝爾獎」名單，香港警隊同時獲得物理學獎同化學獎，「功績」包括將普遍用於教學同觀星嘅雷射筆，重新定義為攻擊性武器，示範近距離燒焦深色紙，引發全城「物理實驗」；頒化學獎畀警隊係因為佢哋喺港鐵站內同老人院一帶發射催淚彈。 經濟學獎「得主」係特首林鄭月娥，話「攬炒之母」林太掌管香港命脈，市傳撤回修例就令港股漲逾千點，引用緊急法嘅同時港股即急挫。 文學獎就由香港首富李嘉誠、DGX團隊及眾連登仔奪得，李嘉誠早前刊登「黃台之瓜 何堪再摘」頭版廣告引起網民無限聯想；DGX團隊及連登仔創作嘅歌曲《願榮光歸香港》街知巷聞。至於和平獎就由「真香港人」獲得，話因為港人抗爭手法層出不窮；一直提供一視同仁救援嘅醫護同急救員就獲得醫學獎。
|
| |
| |
;)
