【明報專訊】立法會財務委員會向來都係民主派拉布嘅戰場，財委會主席陳健波噚日通知議員，提出喺區議會選舉之後，11月29日至明年2月28日期間，加開9次共24個鐘嘅會議。波哥話為「確保反對派有充分時間監察政府的撥款」，處理40多項共500多億元撥款建議，估計全年需要進入加會狀態，又話睇吓「反對派又有咩理由唔同意加會去處理呢啲民生問題」。 波哥形容呢個係「兩全其美」方法，因為可以盡快處理積壓嘅撥款，同令反對派議員有充分時間審核撥款。咁樣開會法波哥點應付？佢話將來一部分工作會交由財委會副主席、金融界議員陳振英主持，對方都同意分擔工作。波哥預告佢𠵱家只係問到2月嘅加會時間，估計要加會加到7月。 委員要喺本月12日前回覆立法會秘書處可唔可以出席加開會議。財委會現時積壓嘅項目包括：4間醫院重建、擴建工程，以及2019/20年度公務員薪酬調整等。原定財會喺7月加會處理積壓嘅項目，但因為立法會被破壞要復修，所以唔能夠加會。
|
| |
| |
;)
