【明報專訊】立法會早已唞暑，但立法會保險界議員陳健波之前一直好忙，今個星期六先會出發去玩。Emily問波哥去邊，佢就講笑話「去𠵱家最危險嘅地方」，原來波哥係去近日接連發生恐怖襲擊嘅西班牙巴塞隆拿。 波哥會歐遊兩周，一早買晒機票去西班牙，佢就話費事改，仲講笑話最危險嘅地方應該最安全，相信當地都緊張咗保安。 波哥暑假都好忙，撈過界做兼職導遊，開立法會導賞團接待市民，佢原本都係諗住淨搞幾團，結果報名反應出乎意料踴躍，要分3日加場，最後搞咗11場，合共接待300幾人，噚日星期日仲朝九晚六直踩4團，每節最少一個半鐘。 導賞團除咗參觀立法會，波哥仲準備茶點同參觀者邊飲邊傾，唔少市民反映教育、房屋等政策意見，波哥話已記低咗，遲啲向特首反映。今次唔少「團友」係一家大細嚟，波哥話參加者中有少數政治立場偏激少少，但大多數都係理性、講道理，想香港好嘅。 波哥又話有唔少支持者鼓勵佢轉直選，但佢表明暫時唔會考慮，仲話無論直選或功能組別議員，都可以表現好或表現差，所以循乜嘢途徑入立法會唔係最重要嘅。
|
| |
| |
