【明報專訊】立法會噚日舉行新舊議員午宴，仲未開餐，Emily就見到「建築、測量、都市規劃及園境界」議員謝偉銓，同前任議員、亦係前對手嘅劉秀成密密斟，言談甚歡。做過兩屆業界議員嘅劉秀成透露，佢哋喺度交流緊明年立法會選舉行情。 問到謝偉銓有無向佢表明想連任嘅心意，劉秀成話「你問我就覺得，(謝偉銓)應該選」，但本身係建築師嘅佢就希望鼓勵多啲年輕建築師參選。不過劉秀成坦言，建築界代表好難贏得席位，因為測量師人數多過建築師，又憶述當年自己因擔任建築師學會會長，有機會與唔同界別人士交流，「先敢出嚟選，如果唔係都幾難選到」。 稱建築師少 難贏議席 雖然劉秀成希望有年輕人接班，但就唔多同意老人家無競爭力。年逾70歲嘅佢話，60歲先係最有經驗，但佢亦話「𠵱家咩人出嚟選都得，要適應時代變遷」。難得新舊議員共聚一堂，有咩忠告畀謝偉銓？劉秀成勸告，測量師要花時間同其他業界多啲溝通，又一語雙關話，「你知邊個係測量師啦，我哋特首嘛」。
|
| |
| |
;)
