【明報專訊】中西區區議會補選周日(26日)舉行，東華同山頂選區嘅候選人都把握最後一星期衝刺拉票。東華選區獨立候選人呂錦強搵咗立法會財委會主席陳健波站台，佢話平常心看待選舉；對手民主黨伍凱欣將聯同民主派搞造勢大會，指𠵱家被左右夾擊，叫大家投票支持。東華候選人仲有劉舒燕。 呂錦強有多名建制派重量級人馬同前高官撐場，伍凱欣就有民主派元老支持。呂透過短訊同Emily講，未來一星期會以平常心看待選舉，「盡心盡力，努力向前」。伍凱欣會繼續喺唔同地方擺街站，佢話「都有機會(勝出)」，但就被夾擊，指兩名對手「一個扮民主、一個扮獨立」，呼籲民主派嘅朋友記得出嚟投票，指建制派嘅鐵票太強。 山頂選區方面，自由黨楊哲安強調最後衝刺階段最重要係提醒大家投票，該黨將搞造勢大會，「信心係有嘅」，有山頂區居民大雨時會送咖啡、糖水畀佢，令佢好感動。另一候選人錢志健話，自己有唔少名人撐場，例如導演張堅庭、李柱銘同劉夢熊等，佢強調自己有能力解決區內交通、治安同衛生等問題。
|
| |
| |
;)
