【明報專訊】前保安局長黎棟國去年獲委任做全國政協委員，不過佢呢兩星期因為屋企有事請假，未能到北京出席全國政協會議。黎棟國早排加入新民黨做副主席，近日頻頻拍住主席葉劉淑儀出席活動，前日喺facebook上載同新民黨灣仔區議員李文龍落區嘅片段，走訪天后留仙街嘅長命斜樓梯，同天后廟道非常狹窄嘅行人路。黎sir仲親身行呢50級嘅樓梯，話行完都感到吃力。 新民黨推新節目《黎sir區區走》 黎sir同Emily講，呢個係新民黨推出嘅全新專題節目《黎sir區區走》，佢已經拍咗幾集，將會去到唔同區，唔單止港島。至於係咪有意參加立法會選舉，黎sir就話「無」，佢話希望幫吓年輕人，拍住新民黨嘅區議員同社區幹事講吓社區問題。 黎sir又話，做得新民黨副主席，當然要積極參與新民黨嘅活動，又話之前都有好多人問過佢係咪想參選㗎喇。
|
| |
| |
;)
