【明報專訊】支聯會前晚舉行第31屆周年大會，選出新一屆常委會，曾喺2011至14年擔任主席嘅李卓人，今次再度擔任主席；副主席就係何俊仁同鄒幸彤。近日上過北京、做咗支聯會副主席11年嘅蔡耀昌就會做秘書。明年係六四31周年，支聯會話會繼續做好居中溝通、揭示真相、搭橋拆牆嘅角色，令內地人同香港人可以真正連結起來，互相支持，一齊爭取民主。 支聯會話，未來會繼續籌辦多元化活動，加強同本地公民社會嘅連結，畀年輕一代認識歷史，毋忘六四，薪火相傳。「六四紀念館」會繼續係支聯會重點工作之一，支聯會希望喺吸引參觀者同籌款方面有改善。 支聯會強調，由6月9號開始，支聯會同港人一齊投入「反送中運動」，「我們雖然堅持『和理非』原則，但亦和年輕勇武抗爭者保持互相理解、配合甚至支援的關係」，指大家都係對抗專制暴政下嘅生命共同體，不能自我分割而偷生。 支聯會去年籌款成績亦唔錯，喺2018年7月1日至今年6月30日期間，捐款同其他收入約474萬元，總支出339萬元，淨收入約135萬元，係支聯會成立以嚟第13次有盈餘。
|
| |
| |
;)
