【明報專訊】今日中秋節，特首梁振英(CY)上周六原來搞咗個中秋園遊會，仲請咗匡智健樂會成員同埋少數族裔家庭，齊齊去禮賓府開party。CY好有心思送禮物畀來賓，但動物權益組織就話佢送禮不當，事關CY送咗怕醜草同蟋蟀，團體質疑動物都係生命，唔應該拎嚟做禮物。 上周六搞園遊會 動物權益組織「動物地球」幹事張婉雯話，CY送蟋蟀畀小朋友，又唔知小朋友識唔識養、唔知小朋友居住環境、唔知小朋友想唔想打理，點知佢哋想養呢？佢話就算蟋蟀無貓狗咁長命，都係一條生命，覺得CY都應該尊重生命，唔好向社會傳達唔好嘅信息。 特首辦﹕可培養愛心 認識自然 上周六出席活動嘅仲有多個行會成員，包括鄭耀棠、廖長城、周松崗、羅范椒芬、張志剛和林健鋒等，梁太唐青儀同兩個女都有去，不過無人諗到送動物會惹麻煩。特首辦回應話，飼養寵物，包括昆蟲，可以培養愛心，並且認識自然。CY喺網誌就話，參加呢個派對嘅唔少都係小朋友，所以為佢哋預備呢兩份禮物，都係簡單易養嘅小生物，仲話小朋友收到時特別覺得有趣。另外，Emily認為，當日匡智健樂會表演中國鼓，同本地藝術團體黃暉木偶皮影劇團幾有娛樂性，CY請弱勢社群節日同樂值得讚賞，但唔知CY會唔會從善如流，唔好再送蟋蟀？
|
| |
| |
;){kind=small}
