【明報專訊】今年廉政公署40周年，廉署下月推出同無綫電視合作嘅新一輯《廉政行動》，仲搵咗專拍警匪片嘅導演林超賢，伙拍早前大熱嘅《狂舞派》導演黃修平，拍攝其中一集《明日》，講吓廉署點破走私奶粉案。新一輯劇共有5集，每集1.5小時，較過往1小時長，希望可以拍得細緻啲，但製作費就較上一次2011年嘅約400萬元，升咗成倍到800幾萬。 5集各個半鐘 長過以前 Emily見成本倍增，作為納稅人都感到肉赤，廉署首席傳媒宣傳創作主任李程寶嫻解釋，因為每集長咗半個鐘，製作費難免較2009年及2011年時貴，強調此劇製作按程序公開招標。 免浪費 內部徵集奶粉罐 有別過去廉署新劇會揀啲大案拍攝，新一輯即以民生議題為主，頭炮《明日》講述一個超市職員(谷祖琳飾演)，私下扣起奶粉存貨，再轉售畀水貨集團圖利。Emily聽講，為求逼真，需要大量罐裝奶粉，而為免入貨又浪費，故喺內部電郵問吓有仔女嘅同事，收集奶粉罐拍攝。另外4集，拍攝打假波、工程貪污案，同埋行賄造市，有一集講警廉關係發展，叫做《戰友》，齋聽個名都知道時代變遷，講警廉近年合作打擊貪污。 《廉政行動》下月5日起，一連5個星期六嘅晚上9點半，喺無綫播放。
|
| |
| |
;){kind=small}
;){kind=small}
;){kind=small}
