【明報專訊】歷時逾半年嘅反修例風波，示威者不時舉辦大大小小嘅遊行或集會，但隨住疫情持續，市民都傾向唔聚集，而「民間集會團隊」由1月開始亦暫停舉行大型公眾活動。不過，好快就係「8．31太子站事件」半周年，民間集會團隊決定聽晚舉行「網上集會」，形容係用新方式保持抗爭熱度。 民間集會團隊今次舉行嘅集會，主題係「疫症當前，警暴蔓延」，除咗回顧「8．31太子站事件」，仲會回顧民間近月抗疫行動期間嘅警暴問題，話要提醒市民警暴無因疫症而停止。 用新方式保持抗爭熱度 呢個「網上集會」係點舉行？團隊聽晚7至9點會喺荔枝角一工廈單位內，邀請多名區議員、8．31事主包括中大學生吳傲雪、教大學生會會長梁耀霆等出席發言，仲搵咗多個「黃色音樂圈」歌手表演打氣，包括莊正同阮民安等。 工廈舉行 網上直播 團隊話會採用以往大型集會嘅流程，包括發表大會宣言、邀請嘉賓發言同演出等，唯一分別係不設公眾席，改喺民間集會團隊嘅facebook同YouTube平台直播，等唔可以親身去太子站嘅市民，改用網上方式參加集會。
|
| |
| |
;){kind=small}
