【明報專訊】武漢肺炎疫情令今年嘅兩會推遲，立法會過去為咗遷就身兼人代同政協嘅立法會議員赴京開會，3月都會休會兩星期；近日立法會多個會議亦取消，不過兩會延遲令立法會多出好多空檔，財委會就決定加會，處理大量積壓嘅撥款項目。除咗本周五(6號)財會將召開7個半小時會議外，財委會主席陳健波噚日通知議員，決定下星期一(9號)同三(11號)加開共9個鐘嘅會議。 近日立法會不同會議係如期定取消，似乎無乜準則，好似噚日財經事務委員會、今日嘅鐵路事宜小組都照常開；但保安、房屋同教育事務委員會則取消。保安事務委員會原定噚日去參觀新屋嶺拘留中心亦告取消。 Emily聽聞，原來建制派上周五開咗內部會議，評估疫情未緩和，所以除咗有急迫性嘅會議都會取消，而噚日財經事務委員會開一個半鐘頭，據聞因為主席張華峰見到有關金融市場嘅不利流言，故希望畀平台官員解畫；鐵路事宜小組則因要盡快處理沙中線超支問題。至於將加會嘅財委會，據了解係因為陳健波見仍有大量議程積壓，所以希望加會盡快處理。
|
| |
| |
