團體促澳洲停動物贈海洋公園

[2016.04.12] 發表

【明報專訊】來自澳洲嘅樹熊美美(圖)因為患上「草酸鹽腎病」，上月喺海洋公園遭「安樂死」，事件引起動物團體關注，豚聚一家、NPV非牟利獸醫、動物地球及公民黨議員等14個單位，噚日聯署去信澳洲駐港總領事館，話海洋公園罔顧樹熊生死，要求澳洲政府終止動物送贈計劃。

動物團體話，美美抵園時，無論園方、獸醫及澳洲政府都話樹熊身心健康，「美美離奇被處死，園方和澳洲政府實責無旁貸」。團體又話，園方喺傳媒查詢下，先承認喺美美患病期間繼續利用牠展覽娛賓，指咁做係罔顧動物福祉、賤視生命。佢哋又話樹熊展館內音量嚴重超標，達100分貝，打擾樹熊作息。

不過海洋公園就呼冤，話美美抵園後不久就患咗「草酸鹽腎病」，話呢種係一種常見但並唔會傳染、亦與環境因素或飲食習慣無關嘅嚴重疾病，徵詢意見後，認為安樂死係唯一能夠為美美解脫痛苦嘅人道安排。園方又話，南澳洲政府、克萊蘭德野生動物園及園方一直就有關樹熊嘅研究工作及教育展示緊密合作。園方展館備有測量音量的儀器，以確保樹熊居住環境音量維持於認可水平。