【明報專訊】歐洲冠軍聯賽決賽周日凌晨結束，英超球隊利物浦主力受傷兼龍門送兩球大禮，以1﹕3輸畀西甲勁旅皇家馬德里。呢場波真係有唔少話題，而政界唔少「利迷」都唔服，大罵皇馬球員茅柴，大埔區議會幾個議員深夜相約睇呢場大戰，利迷周炫瑋見到愛隊輸得咁慘，仲淚灑當場，成晚瞓唔到。 劉國勳話要DQ拉莫斯 歐聯決賽係球迷大事，唔少政圈朋友都唔介意捱夜睇波。賽事好戲劇化，先係開賽無耐，利記王牌前鋒穆罕默德沙拿，被對手沙治奧拉莫斯壓傷肩膀甩骱，含淚傷出；其後利記守門員卡利奧斯兩個低級失誤失球，結果皇馬連續三屆奪冠。 賽事期間，有議員球迷已經喺社交網站開火，好似民建聯劉國勳，就話要「強烈譴責拉莫斯」，指佢存心整傷利記球員，話要「DQ佢」。 大埔區議會幾名民主派議員關永業、任啟邦、劉勇威及周炫瑋就一齊睇波，其中任啟邦及周炫瑋係利迷，而劉勇威就著埋皇馬波衫觀戰，現場都有啲「火藥味」。中立嘅關永業話周炫瑋賽前話「人生有幾多個十三年(13年前奪冠)」，結果利記慘敗，周表現難過。相反，劉勇威見證愛隊創造歷史，就好興奮喇。 關永業就話場波本來好刺激，但勝負關鍵唔係拉莫斯踢傷沙拿，話拉莫斯係茅，犯規又抽水，但應該唔係想故意整傷沙拿，成場波轉捩點其實係利記龍門犯大錯，先至令到利記無得翻身啫。
|
| |
| |
;){kind=small}
;)
