【明報專訊】國際青年商會香港總會噚日發表網上調查，有62%受訪者認為香港海岸唔清潔，59%人認為現行政府政策未能有效保護海岸清潔，反映政府推動「海洋減廢」措施成效不彰；調查又發現，91%受訪者話香港海灘最常見嘅垃圾係塑膠。 有見及此，商會喺9月15日「世界清潔日」將舉行大型海灘清潔活動，希望參與活動嘅市民反思過度消費模式會加劇破壞環境。商會噚日舉行啟動禮，環境局長黃錦星亦到場，話政府會加緊制訂相關塑膠法規，例如飲品塑膠容器。 商會委託樹仁大學社會工作研究及發展中心於5月至6月上旬，以網上問卷形式做「香港海岸清潔及源頭減癈」調查，訪問咗500名市民，除咗海洋垃圾，亦問咗與環保意識有關嘅問題，結果發現，78%受訪者認同未有盡力防止資源被消耗；92%人認為如不善用資源，人類終有一日會面對資源短缺。 要畀錢減廢 成半人唔制 不過，調查發現只有51%人表示為咗源頭減廢願意畀多啲錢，15%話唔願意，反映環保都係知易行難，要市民掏腰包就更難。
|
| |
| |
;)
