【明報專訊】近期唔同政治立場嘅網民或團體，都分別發起「感謝」活動，去幫襯所謂「黃店」、 「藍店」。新民黨主席葉劉淑儀噚日亦「加持」西營盤老牌菜館「加記」，大讚餸菜鑊氣夠、分量足。葉太facebook帖文一出，即惹嚟唔少人關注，有人大讚支持，但唔少應該係黃絲網民留言，話葉太靠害，提供「罷食」食店名單畀佢哋；有人仲話葉太提供「裝修名單」畀人去破壞。 加記食店嘅故事，親中報章都有報道，話之前警方清場行動，加記向警察提供冰水，畀人影咗相放上網，老闆話生意大跌，再咁搞落去，要「申請破產，再搵層樓跳」。 報道又話，加記亦有向示威者同記者提供汽水。 葉太就話，早前趁議會工作完畢，想「加餸」慰勞吓自己，所以去加記，又話老闆娘見到佢十分熱情。葉太話點咗招牌菜「加記素小炒王」做外賣，返屋企同工人一齊分享。 葉太聞言回應：恐怖主義手段 唔少網民留言讚葉太，但有人同葉太講，話有葉太點名，「老闆話咁樣更加水洗都唔清，好快唔使做生意了」；有人更話葉太提供「裝修名單」。葉太聞言好勞氣回應，「用『 裝修』 去恐嚇『藍店』 及其顧客，這不是恐怖主義手段嗎？這不是打壓我表達意見及光顧食肆的自由嗎？這不是違反法治及人權法嗎？」
|
| |
| |
;)
