談一地兩檢官員解釋方案 曾鈺成「醜婦」比喻 卿姐：何不用「醜男」？
[2017.07.14] 發表
【明報專訊】高鐵一地兩檢方案預料快將公布，立法會前主席曾鈺成噚日接受民主黨前主席劉慧卿(卿姐)網台節目訪問，提到政府官員最終都要向公眾解釋方案、「醜婦終須見家翁」，卿姐聞言即刻叫曾鈺成唔好用侮辱女性嘅比喻，應該用稱讚，「點解唔可以話醜男？」曾鈺成似乎知道得罪咗卿姐，即刻笑笑口改叫「醜女婿終須見外母」。
全國政協委員胡漢清早前講一地兩檢時，話國務院1997年頒布嘅《香港特別行政區行政區域圖》，無列明地底屬於香港自治範圍。卿姐噚日提到胡漢清講法，曾鈺成笑言「可能都得」，又引述典故，話春秋時代鄭莊公同母親不和，鄭莊公話「不及黃泉無相見」，即係「不到黃泉，永不見面」，曾鈺成講笑話現時喺高鐵西九站「掘個地洞，(鄭莊公)咪可以見番阿媽」。卿姐話，曾鈺成將一地兩檢比喻做黃泉，因住畀人鬧呀。
另外，中國外交部早前形容《中英聯合聲明》係歷史文件，已不再具任何現實意義，對中央對香港嘅管理亦不具任何約束力，卿姐猛烈批評有關說法，但曾鈺成就反駁，相關嘅爭拗「無謂」，係「無聊嘅嗌交」，因為中英聯合聲明內容已經寫咗喺《基本法》，即使中國真係違反聲明，「(你)期望英國佬做咩？」
更多港聞
【明報專訊】街工立法會議員梁耀忠好黑仔，議員辦公室今個禮拜爆發疫情，有兩名同事同時有手足口病返唔到工。
梁耀忠話，星期一晚先有同事發現...
詳情
月入2萬家 升中花一半 買校服書簿樂器 「為子女沒辦法」
【明報專訊】昨天為中一註冊首日，有家長與子女到獲派中學註冊後，隨即到書局購買教科書。今年的教科書售價較去年漲3至4%，有家庭月入2萬多元的家... 詳情
相關新聞
