【明報專訊】唔少政黨或團體代表，都會趁星期二朝早行政會議開會前去到特首辦門外請願，而特首亦會按慣例出去接信，而噚日就出現有趣場面，本身係行會成員嘅新民黨主席葉劉淑儀，走出嚟變咗示威者，與該黨南區區議員陳家珮一齊向特首遞信請願，仲拎晒道具牌咁要求醫管局加強緊急中風治療服務。原來因為東區醫院計劃縮減服務，令港島區未來只有瑪麗醫院提供有關服務，相信葉太孖住有意出戰港島補選嘅陳家珮示威，其實都想增加愛將嘅知名度同曝光率。 噚日去請願嘅仲包括其他有意出戰補選人士，好似工聯會何啟明就同有意出戰新界東嘅黨友鄧家彪，齊齊喺行會門外要求政府盡快取消強積金對冲，指不能一拖再拖。參加泛民新東補選初選嘅工黨郭永健則就律政司長鄭若驊獨立屋僭建一事抗議，批評司長僭建就可以無限大，窮人就無屋住要瞓街。
|
| |
| |
;){kind=small}
;)
