【明報專訊】想親手「點亮」古色古香嘅煤氣燈、入旗袍店揀件靚衫，未必要去現場嘅，透過互動插畫地圖，大家都可以置身其中。旅發局推出新一輪「舊城中環」計劃，其中一個重點推介係位於元創坊(PMQ)嘅「藝遊『舊城中環』互動展」。 旅發局市場推廣總經理曹天麗同Emily講，佢哋邀請本地插畫家「飛天豬」，用8個中上環地點為題創作插畫，市民同遊客點入互動地圖，可以見到唔同特效，例如都爹利街主題插畫，用手觸碰熒幕上煤氣燈，燈光就會亮起；喺伊利近街旗袍店插畫仲可以為畫中人揀衫；而「閣麟街涼茶舖」為題嘅插畫，就可以伸手開電視機。 二維碼藏「中上環深度遊」地圖 另外，展覽場地設有QR Code，用手機「掃一掃」就連結到網上地圖，入面推介一條中上環深度遊路線，遍及17個地點，遊客唔使驚蕩失路啦！8個地方、約50個旅客指示牌貼有特色海報，唔止印有QR Code，仲教大家廣東話詞彙同發音，例如「飲茶」、「飲嘢」等。 提提大家，特色海報同互動展覽係「期間限定」，展示期由今日至下月11號。
|
| |
| |
;){kind=small}
;)
