【明報專訊】立法會補選正值提名期，其中新界東已有多人表態參選，最新一個就係過去幾次立法會選舉都有參與嘅西貢區議員方國珊，佢今日下晝將會喺大圍港鐵站外搞造勢大會，佢嘅宣傳照上就寫有「全力以赴．重民生」。 曾兩次高票落敗 方國珊喺2012年、2016年嘅立法會大選中都循新界東出戰，兩次都以高票落敗，2016年9月嘅大選佢就攞到3.45萬票，與社民連梁國雄得票只相差約1000票，未能取得末席，可以話係飲恨；而2016年初嘅新東補選，喺單議席單票制下，方國珊取得3.3萬票，但就與楊岳橋取得嘅16萬票有一段距離。方國珊喺2016年大選落敗後，曾經表態唔會再參選，更對傳媒形容已經「使晒啲姑婆本」，今次補選佢又去馬，政治真係一日都嫌太長，更何况今次距離上次選舉已有超過一年呢。新界東已報名參選嘅，有新民主同盟范國威、工聯會鄧家彪、陳玉娥和陳國強。
|
| |
| |
;)
