【明報專訊】好多人會旅行避年，有旅行社話，有九成新春團已經爆滿，特別係啲豪華團，例如去地中海、東歐同北歐等地，而今個新春適逢日本岡山有「裸祭」，亦有旅行團會帶團友去睇近萬名上半身裸體、下半身圍住「襠布」嘅男人，去寺廟搶寶木嘅傳統活動，而呢個團都好受歡迎，早已爆滿，名額有30個。 康泰：料報團客增一成 康泰旅行社董事及行政總裁黃進達(Jason)話，因為近月股市暢旺，農曆新年有九成旅行團已爆滿，料報團人數比去年同期升5%至10%，仲有人已經開始計劃復活節假日嘅旅程，亦已開始報名，例如日韓賞花團等。Jason話，可能港人成日去旅行，近年成日都要不斷發掘新地方同景點，今年農曆新年以長期特色豪華團嘅成團率最高。 另外，隨住港珠澳大橋同高鐵香港段即將通車，佢哋都有設計高鐵團，Jason話未來由香港搭高鐵去潮汕、廈門、桂林等地旅行會更便利，交通時間縮減外，亦有較多班次畀大家選擇，設計旅程上又會有更多彈性，可以去多啲景點。
|
| |
| |
;)
