【明報專訊】渠務署長唐嘉鴻服務政府37年，今個月榮休。發展局長黃偉綸噚日發表網誌，「借位」畀署長分享難忘往事。唐嘉鴻話，最難忘莫過於參與淨化海港計劃第一期工程；佢又寄語同事繼續以開放態度接受新技術、新思維，利用科技改善渠務工作，造福市民。 唐嘉鴻話，淨化海港計劃係香港歷來最大環保基建項目，要建23公里深層污水輸送隧道，將污水由九龍及港島北送到昂船洲污水廠，佢喺1993年出任渠務署高級工程師，有幸參與呢項1994年展開嘅工程。佢憶述施工期間遇上唔少困難，首期工程最終亦能喺2001年底啟用。唐嘉鴻話佢喺2015年出任署長，咁啱第二期甲工程完工，有機會監督其落成同啟用。佢話工程大大改善維港水質，維港渡海泳亦於2017年回復40年前嘅賽道，雖然工程歷時20年建造，但絕對值得等待。 感激同事山竹期間堅守崗位 唐嘉鴻又話難忘去年超強颱風山竹襲港，部門總動員應對嘅情况，向上下一心及隨時候命嘅同事表示感激。
|
| |
| |
難忘去年「山竹」襲港，部門總動員應對。圖為發展局長黃偉綸（左一）喺風暴期間到渠務署緊急事故控制中心，聽取唐嘉鴻報告水浸情况。（發展局提供）');){kind=small}
;)
