【明報專訊】雖然今日已經係年十四，但唔同組織仍舉辦新春活動，趁機聯誼一番，其中民建聯港島4區支部噚日下午喺一間酒樓舉辦新春團拜，官員都好畀面，政務司長張建宗、律政司長鄭若驊、教育局長楊潤雄同食物及衛生局長陳肇始以及部分副局長、部門官員均有到場。民建聯副主席張國鈞致辭時就笑言，該黨立法會議員、區議員等都在場，官員可以趁機會游說，「有咩政策未搞掂嘅，今日係好好機會」。 張建宗致辭時趁機評論吓噚日朝早舉行嘅渣打馬拉松，佢形容「馬拉松成功、無咩大問題，只係得十幾個人(最終有29人)去醫院啫，但都係小事嚟」。佢又不忘大讚民建聯，話民記人數已打破4萬，證明民記為政府出謀獻策，亦喺地區打好根基，並唔係「堅離地」嘅政黨。 張建宗又大玩食字，話豬字「PIG」有兩個意思，佢希望香港今年好似豬咁，一樣有進步(Progress)、創新(Innovation)同增長(Growth)；又寄語議員及官員要做到「PIG」：工作要有熱誠(Passion)、要互相啟發(Inspiration)同慷慨、出心出力服務市民(Generosity)。
|
| |
| |
;){kind=small}
;)
